About Me

ಮನುಷ್ಯನಿಗೆ ಈ ಚಡಪಡಿಕೆಗಳು ಎಷ್ಟು ಹಳೆಯದೋ ಅಷ್ಟೇ ಹಳೆಯದಾಗಿದ್ದು ಅದರಿಂದ ಹೊರಬರುವ ಆತನ ಪ್ರಯತ್ನಗಳು. ಮುಗಿದದ್ದು ಮುಗಿದೇ ಹೋಯ್ತು ಎನ್ನುವಷ್ಟರಲ್ಲಿ ಮನೆ ಹೊಸ್ತಿಲಲ್ಲಿ ಕಾದು ಕೂತು ತಟ್ಟೆ ಬಡಿಯುವ ಭಿಕ್ಷುಕರ ಗುಂಪಿನಂತೆ ಮತ್ತೊಂದಷ್ಟು ಚಡಪಡಿಕೆಗಳು..ಅವುಗಳನ್ನ ಹೊರನೂಕುವ ಆತನ ದಾರಿಗಳು ನೂರು.. ಅನಾಸಿನ್ ಮಾತ್ರೆಯಿಂದ, ಫ್ಯಾನಿಗೆ ನೇತು ಬೀಳುವ ಗತಿಯ ತನಕ. ಈ 'ಆತ'ನಲ್ಲಿ ನಾನೂ ಒಬ್ಬನಾಗಲೇಬೇಕಾಗಿರೋದ್ರಿಂದ ನನ್ನ ಚಡಪಡಿಕೆಗಳ ಮೂಲದ ಕುತ್ತಿಗೆ ಹಿಚುಕುವಲ್ಲಿ ನಂಗೋಸ್ಕರ ನಾನು ಮಾಡಿಕೊಂಡಿರೋ ಒಂದು ಸಫಲ ಪ್ರಯತ್ನ ಈ 'ಬರವಣಿಗೆ' : ಬಹುಷಃ ಹಲವರಂತೆ. ಈ ಪ್ರಯತ್ನಕ್ಕೆ ಬೇರೆ ಬೇರೆ ಹೆಸರೂ ಕೊಡಬಹುದು. "ನಂದೇ ಆದೊಂದು ಐಡೆಂಟಿಟಿ ಬೇಕು" ಅನ್ನೋ ಹುಚ್ಚು ಇರಬಹುದು, ಸ್ನೇಹಿತರ ಸರ್ಕಲ್ಲಿನಲ್ಲಿ "ಭಾವುಕ" ಅನ್ನೋ ಹಣೆ ಪಟ್ಟಿಯಿಂದ ಭಿನ್ನವಾಗಿ ಬೆಳೆಯಬಹುದು ಅನ್ನೋ ವಿಲಕ್ಷಣ ಮನೋಭಾವವಿರಬಹುದು, ಹುಡುಗಿ ಕೈ ಕೊಟ್ಟಾಗ ಬ್ರಾಂದಿ ಬದಲು ಬರಹ ಮೇಲು ಅನ್ನೋ ಮುಂಜಾಗರೂಕತಾ ಖುಷಿ ಇರಬಹುದು..! ಗೊತ್ತಿಲ್ಲ.... ಯಾರೇ ಏನೇ ಹೇಳಿದರೂ ಸಧ್ಯಕ್ಕೆ ಒಂದು ಸುದೀರ್ಘ "About Me" ಬರೆದು ಮುಗಿಸಿದ ಮಜಾ ಇದೆ..!!

Monday, January 16, 2012

ನನ್ನವಳ ನನ್ನವರು ನಾನಾದಾಗ..!

ನೀನೊಮ್ಮೆ ಸಿಕ್ಕಿಬಿಡು ತಾಳಿಕಟ್ಟಲು..
ಕಾಫಿ ಬಟ್ಟಲಿನಿಂದ ಮಗುವಿನ ಉಚ್ಚೆಯ
ತೊಟ್ಟಿಲ ತನಕ
ಎಲ್ಲವನ್ನೂ ತೊಳೆಯುತ್ತೇನೆ..!

ನನ್ನಪ್ಪನೂ ಹೀಗೇ ಹೇಳಿರಬೇಕು
ನನ್ನಮ್ಮನಿಗೆ..
ಈಗಲೂ ಕಾಫಿ ಬಟ್ಟಲ ಕೆಲಸ ನನ್ನಪ್ಪನದೇ..
ಬಚ್ಚಲೂ ಸೇರಿ..!

ಹಬ್ಬ ಪಾರ್ಟಿಗಳ ನಿನ್ನುದ್ದ ಬೆರಳಿಗೆ
ಗೋರಂಟಿ ಗೀರನ್ನು ಹಚ್ಚೆಯಂತೆ ಹಚ್ಚುತ್ತೇನೆ..
ವಕ್ರವಾದರೆ ಚೀರಬೇಡ..
ನಿನ್ನಂದದ ಮುಂಗುರುಳೂ ವಕ್ರವೇ..

ಹುಡುಗಿಯ ಮೊಬೈಲಿನಿಂದ
ಎಂದೋ ಒಂದೊಂದು ಮೆಸೇಜು ಬಂದರೆ
ರಾತ್ರಿ ಊಟ ಹಾಕದೇ ಇರಬೇಡ..
ಪಕ್ಕದ ಮನೆಯವನ ಪರಸ್ತ್ರೀ ನೀನು..
ನಿನ್ನ ಬಿಟ್ಟು ನಂಗೆಲ್ಲರೂ ತಂಗಿಯರೇ..!!

ಹಾಗೆಂದು..
ತವರಿಗೆ ಬಾ ತಂಗಿ ಎಂದಾಗ
ಊಟ ಬಿಟ್ಟು ಓಡಬೇಡ..
ಹಸಿದ ನಿನ್ನ ಮುಖ ನೋಡಿ
ವರದಕ್ಷಿಣೆ ಕಿರುಕುಳ ಎಂದುಕೊಂಡಾರು ನಿಮ್ಮಮ್ಮ..!

ಇವೆಲ್ಲ ಸಾಕು..
ನಂಗೊಂದು ಮಗು ಬೇಕು..!!
..........
(ಮಾತು ಮುಗಿದ ಸಮಯ..!).

Posted by at 9:48 PM

3 comments:

  1. ಈಶ್ವರJanuary 17, 2012 at 5:52 AM

    ನಿನ್ನ ಪ್ರೇಮದ ಪರಿಯ ನಾನರಿಯೆ ಕನಕಾಂಗಿ ಗೂ
    ಇದಕ್ಕೂ ಹೇಳುವ ಶೈಲಿಯ ವ್ಯತ್ಯಾಸ ಇರಬಹುದು, ಭಾವ ಒಂದೇ..

    ಪ್ರಾಮಾಣಿಕತೆಯ ಪ್ರೀತಿ, ಕವನದ ಹೊಸತನ ಎರಡೂ ಚೆನ್ನಾಗಿದೆ. ಎಲ್ಲಾ ಓದಿದ್ದೇನೆ, ಎಲ್ಲಕ್ಕೂ ಉತ್ತರಿಸಲು ಸ್ವಲ್ಪ ಸಮಯ ಕೇಳುತ್ತಾ ಇದ್ದೇನೆ.,

    ಬರೀತಾ ಇರು.. ಒಳ್ಲೇದಾಗಲಿ .. ಬ್ಲಾಗ್ ಮಾಡಿದ್ದು ತುಂಬಾ ಖುಷಿ.

    ReplyDelete
  2. UnknownNovember 20, 2012 at 12:34 AM

    super ide guru :)

    ReplyDelete

Subscribe to: Post Comments (Atom)