ಓ ನನ್ನಮ್ಮನ ಸ್ಲಿಮ್ ಸೊಸೆಯೇ..

ಓ ನನ್ನಮ್ಮನ ಸ್ಲಿಮ್ ಸೊಸೆಯೇ..
ತಪ್ಪಿಯೂ ನಿನ್ನ ಸೊಂಟಕ್ಕೆ Tyre ಬರಿಸಿಕೊಳ್ಳದಿರು..!

ಬಹುಷಃ ಅಮ್ಮ ಯೋಗ ಮಾಡಲು ಕಲಿತಿದ್ದು
ನಿನ್ನ ಸಿಂಹಿಣಿ ನಡು ನೋಡಿಯೇ ಇರಬೆಕು..
ನಾನೊಮ್ಮೆ ಕದ್ದು ನೋಡಿದ್ದೆ.. ನನ್ನಮ್ಮ
ನಿನ್ನ ಸೊಂಟ ಕದ್ದು ನೋಡುವುದನ್ನ..!

ಅವತ್ತಿನಿಂದಲೇ ಇರಬೇಕು..
ಅಮ್ಮನ ಸೊಂಟ ಇಳಿದಿದ್ದರೂ
ನಿನ್ನ ಕಟಿಯೆಡೆಗಿನ ಕಳ್ಳನೋಟ,
ವ್ಯಾಯಾಮದೆಡೆಗಿನ ಸಾಧಕ ನೋಟ
ಏರುತ್ತಲೇ ಹೋಗಿದ್ದು..!

ಇತ್ತ ನಂಗೂ,ಅಪ್ಪನಿಗೂ ಅಲ್ಲಲ್ಲೇ ಮುಸಿನಗು..
ಏಕೆಂದರೆ..
ತೆಳು ಸೊಂಟದಾಸೆಯಿಂದ ಮನೆಕೆಲಸವನ್ನೆಲ್ಲಾ
ನಿನಗೆ ಹಚ್ಚದೇ ತಾನೊಬ್ಬಳೇ
ಮಾಡಿ ಮುಗಿಸುತ್ತೇನೆಂಬ ಹಠ ಅಮ್ಮನದು..!

ಹೀಗೇ ದಿನವಿಡೀ ದುಡಿದು,
ಯೋಗ,ಅಭ್ಯಂಜನಾದಿಗಳನ್ನು ಬಿಡುವಿರದೇ
ಕಡಿದು ಗುಡ್ಡೆ ಹಾಕಿದ್ದಕ್ಕೆ..
ಅಮ್ಮನಿಗೆ ಸಿಕ್ಕ ಫಲ..
ಸೊಂಟ ಒಂದು Round ಕಮ್ಮಿಯಾಗಿದ್ದು..!
ನನ್ನಪ್ಪನ ಮುದ್ದು ಡುಮ್ಮಿ ಕೊನೆಗೂ ಸುಮ್ಮನಾಗಿದ್ದು..!

ಆದರೆ.. ಪಟ್ಟ ಅನಾವಶ್ಯಕ ಕಷ್ಟಕ್ಕೆ
ಜ್ವರ,ಬಳಲಿಕೆಯಿಂದ ನರಳಿ,
ಹಾಸಿಗೆ ಹಿಡಿದಾಕೆ Recover
ಆದ ತಕ್ಷಣ.. ಕಾಫಿ ಮಾಡುವಾಗ
ನನ್ನೊಬ್ಬನನ್ನೇ ಅಂತ್ಯಾಕ್ಷರಿಗೆ ಕರೆದು ಮೊದಲು
ಶುರು ಮಾಡಿದ ಹಾಡು..

ಸೊಂಟದ ವಿಷ್ಯ.. ಬ್ಯಾಡವೋ ವಿಶ್ವ..!!