ಜಾತ್ಯಾತೀತ

ಇಲ್ಲೊಬ್ಬ ಮನುಷ್ಯನಿದ್ದಾನೆ..
ಹುಟ್ಟಿದಾಗ ಎಲ್ಲರಂತೆ ಮಗು..
ಜನಿಸಿದ್ದು ನಕ್ಷತ್ರದಲ್ಲೋ,ಉಲ್ಕೆಯಲ್ಲೋ,
ಉಪಗ್ರಹದಲ್ಲೋ.. ಮಗುವಿದ್ದಾಗ
ಗೊತ್ತಿರಲಿಲ್ಲ ಅವನಿಗೆ..

ಹೀಗೇ ದೊಡ್ಡವನಾಗುತ್ತಾ
ಕೈ ಕಾಲು ಕೆಸರು ಮಾಡಿಸಿ..
ಕೊನೆಗೊಂದಿನ ಹೆಣ್ಣು ಬಸಿರಾಗುವ ಬಗ್ಗೆಯೂ ತಿಳಿಸಿ
ಬೆಳೆಸಿಬಿಟ್ಟಿತು ಸಮಾಜ..!

ಆದರೆ

ಹೆತ್ತ ತಾಯಿಯಲ್ಲಿ,
ಮುತ್ತಿಕ್ಕಿದ ಗೆಳತಿಯಲ್ಲಿ
ಒಂದೇ ಪ್ರೀತಿ ತೋರಿಸಿದ ಸಮಾಜ..
ಒಂದೇ ಜಾತಿ ತೋರಿಸಲಿಲ್ಲ.

ತನ್ನಪ್ಪನಾಕೆಯನ್ನು ಒಪ್ಪಿಕೊಂಡ ಜಾತಿ
ತನ್ನಾಕೆಯನ್ನು ಒಪ್ಪಲಿಲ್ಲ..
ಕಿಡಿ ಕಾಡ್ಗಿಚ್ಚಾಗಿದ್ದು ಆಗಲೇ..
ಬೆಳಗ್ಗೆ ಸಂಧ್ಯಾವಂದನೆ ಮಾಡಿ
ಸಂಜೆ ಕುರಿ ಕಾಯಲು ತೊಡಗಿದನಾತ..!

ಪರಶಿವನ ಪತ್ನಿಗೆ ಪರ್ವೀನಾ
ಎಂದು ಹೆಸರಿಟ್ಟ..!
ಕತ್ತಿನ ಶಿಲುಬೆ ಒಂದಿನವೂ ಚುಚ್ಚಲಿಲ್ಲ..
ಒಂದು ರಾಹುಕಾಲದಲ್ಲಿ
ತನ್ನಮ್ಮನಿಗೆ ತನ್ನಾಕೆಯನ್ನು ಪರಿಚಯಿಸಿ,
ಜಾತಿ ಬಿಡದೇ,
ಜನತಾದಳಕ್ಕೂ ಸೇರದೇ..
ಜಾತ್ಯಾತೀತನಾದ..!

ಇಲ್ಲಿ ಅದೇ ಮನುಷ್ಯನಿದ್ದಾನೆ..
ಬಹುಷಃ ಅದು ನಾನೇ ಆಗಿದ್ದೇನೆ..!