ಶಕ್ತಿಪಾತಮಾತಾ ತಾಂತ್ರಿಕಾಭಿವ್ಯಕ್ತಿಸ್ವರೂಪಿಣೀ..

ನಾಸಿಕದ ಗತ್ತಿನಂಥ ನತ್ತು,
ಬೆಂಡೋಲೆಯಂಡಲ್ಲಿಲ್ಲದ ಚುಚ್ಚುಗಾಯ,
ಕಿರುಬೆರಳಿನ ಕತ್ತಿನುಂಗುರ,
ಹಾರ,ಸಿಂಗಾರ,ರೇಷ್ಮೆನೂಲು..

ಪಂಚಾಕ್ಷರಿಯಭಿನಂದನೆ,
ಮಲ್ಲಿಗೆಹಾರ ಡೊಂಕಾಗಿನಿಂತ ಚೂಪೆದೆ,
ಎದೆಸೀಳಿಗಿಳಿಯದ ಪಚ್ಚೆಮಣಿಮಾಲೆ,
ಖಣಖಣಿಸಿಯೂ ಒಡೆಯದ ಕುಸುರಿಬಳೆ..

ಪೂರ್ಣಕುಂಭಕ್ಕೊರಗಿದ ಜುಟ್ಟುಗಾಯಿ,
ಪ್ರಭಾವಳಿಯೊಡತಿ.. ಅರಿಶಿನಪ್ರಭಾವತೀ,
ಕಿರೀಟದಂಚಿನ ಸರಮುತ್ತಿನ ಕೊನೆಯಗಂಟು,
ಹನ್ನೆರಡಾರತಿ ಸಾಕೆನ್ನದ ದೀಪಮೋಹಿತೆ..

ಸಾವಿರ ಸೂಜಿಮೊನೆಕಾಡುಗಳ ಶಾಂತವನ:ವದನ,
ಬಂದಿ ಬಂಧಿಸಿದ ತುಂಬುತೋಳು,
ಅಲೆಯಾದಿಯೆನಿಸುವ,ತರಿಯಿಲ್ಲದ ತಲೆಗೂದಲು,
ಜೇನು,ಹಾಲು,ತುಪ್ಪದ ತಪ್ಪದ ದಿನಸ್ನಾನ..

ಧೂಪ,ಘಮ,ಪ್ರಣಾಮ..ಸ್ತ್ರೀರಾಮ,
ಸುಷುಮ್ನಾತೀರದ ಸಹಸ್ರಾರಶ್ರೀಮಂತೆ,
ಬಿಸಿಪತಿಯ ಒಳಗಿಳಿಸಿ ತಣಿಸಿದ ಭಗ,
ಕಾಮಿನಿ,ಜನನಿ,ಭಗಿನಿ,ಕುಂಡಲಿನಿ,
ಶಕ್ತಿಪಾತಮಾತಾ ತಾಂತ್ರಿಕಾಭಿವ್ಯಕ್ತಿಸ್ವರೂಪಿಣೀ..

LSD(Drugs) ಸೇವಿಸಿ ವೇಶ್ಯಾಗೃಹಕ್ಕೆ ಹೋದಾಗ ಮಂಚದ ಮೇಲೆ ಕೂತವಳನ್ನ ಹೀಗೆ ಕಂಡು ವಾಪಾಸ್ ಓಡಿ ಬಂದವನೊಬ್ಬನ ಉವಾಚ..!!