ಸಂಸಾರ - ಸನ್ಯಾಸ

ಯೋಗಿ ಹೇಳುತ್ತಾನೆ..
ಬಾರೋ ಮನೆಯಿಂದಾಚೆ..ಹಳಸಿದ ಹೊಲಸಿದೆ ಅಲ್ಲಿ,
ಶಯನದ ಶೋಭನ ಶುಭವಲ್ಲ ನಿನಗೆ,
ಶುಚಿಯಿದ್ದಲ್ಲಿ ಶಿವನಿರುತ್ತಾನೆ..!

ಸಂಸಾರಿ ಹೇಳುತ್ತಾನೆ..
ಧ್ಯಾನ ಮಾಡಲು ನೆಲವಾದರಾಯಿತು,ಗುಹೆಯೇ ಯಾಕೆ?
ಕೈಲಾಸ ಗಬ್ಬೆದ್ದ ಗುಹೆಯಲ್ಲ.. ಶಿವನ "ಮನೆ"...!

ಯೋಗಿ ಇನ್ನೊಮ್ಮೆ..
ಯಮನ ಪಾಶದ ಒಂದು ಎಳೆಗೆ
ಒಂದಿನದ ವೀರ್ಯನಾಶ ಸಮ..
ಕೈ ಕೆಸರಾದರೆ ಕೊನೆಯುಸಿರು ಅಷ್ಟೇ..!!

ಇತ್ತ ಸಂಸಾರಿ..
ಎಲವೋ ಯೋಗಿ..ನೀನು ಹುಟ್ಟಿದ್ದು
ನಿನ್ನಮ್ಮನ ಬಸಿರಿನಿಂದ,
ನಿನ್ನಪ್ಪನ ಬಿಸಿಯುಸಿರಿನಿಂದ..ಕೆಸರಲ್ಲ ಅದು..
ದೇವರು ದೂರವಾಗುವುದು ತಪ್ಪುಗಳಿಂದ..
ಕೊನೆಯ ತಪ್ಪು ಕೊನೆಯದಾಗಿದ್ದರೆ
ಭೋಗಿ ಯೋಗಿಯಷ್ಟೇ ಪವಿತ್ರ..

ನಾಳೆ ಸುಮ್ನೆ ಮನೆಗೆ ಬಾ..

ಸಂಸಾರಿ -- ಅಪ್ಪ
ಯೋಗಿ -- ಮಗ...!