ಬಿಟ್ಟು ಹೋಗದ ಮುನಿಸು

ದೀಪದಾ ಮಡಿಲಿನಲಿ
ತುಂಬಿ ಹರಿದ ಇರುಳು ಇದು..
ಬತ್ತಿಯ ಜೊತೆಯ ಸಲ್ಲಾಪ ಮರೆತು
ಬೆಳಕೊಮ್ಮೆ ಇಣುಕಬಾರದೇ ಇಲ್ಲಿ?

ಜಾತ್ರೆಯಾಗಿದೆ ಮನಸು
ಬೆಂಡು ಬತ್ತಾಸುಗಳ ಕಹಿಯೊಂದಿಗೆ..
ಒಡೆದ ಆಟಿಕೆಯಂಥ ಧಮನಿಯನ್ನು
ನಿನ್ನೊಲವೊಮ್ಮೆ ಜೋಡಿಸಲಾಗದೇ ಇಲ್ಲಿ?

ಕೂಗಿ ಹೇಳುವ ಬಯಕೆ..
ಮುನ್ನುಡಿಯಾಗು ನನ್ನ ಶೀರ್ಷಿಕೆಗಾದರೂ..
ಕೊನೆಯ ಪುಟದ ನನ್ನ ಕೊನೆಯಕ್ಷರಕ್ಕೆ
ಶಾಯಿಯೂ ಆಗಲಿಲ್ಲವಲ್ಲ ನೀ ಇಲ್ಲಿ..

ಗೋರಿಯೂ ಕೊನೆಯೇ.. ಭಸ್ಮವೂ ಕೊನೆಯೇ..
ಲೀನವಾಗುವಾಗ ಪ್ರಾಣ ತರಬಲ್ಲದೇ ಪ್ರೀತಿ?
ಅಂತೂ..
ನನ್ನಂತಿಮಕ್ಕೂ ಅರ್ಥ ಸತ್ತಿತು ಇಲ್ಲಿ..
ನಿನ್ನ ಕೊಂಚ ಪ್ರೀತಿಯೂ ಇಲ್ಲದ ಇಲ್ಲಿ..