About Me

ಮನುಷ್ಯನಿಗೆ ಈ ಚಡಪಡಿಕೆಗಳು ಎಷ್ಟು ಹಳೆಯದೋ ಅಷ್ಟೇ ಹಳೆಯದಾಗಿದ್ದು ಅದರಿಂದ ಹೊರಬರುವ ಆತನ ಪ್ರಯತ್ನಗಳು. ಮುಗಿದದ್ದು ಮುಗಿದೇ ಹೋಯ್ತು ಎನ್ನುವಷ್ಟರಲ್ಲಿ ಮನೆ ಹೊಸ್ತಿಲಲ್ಲಿ ಕಾದು ಕೂತು ತಟ್ಟೆ ಬಡಿಯುವ ಭಿಕ್ಷುಕರ ಗುಂಪಿನಂತೆ ಮತ್ತೊಂದಷ್ಟು ಚಡಪಡಿಕೆಗಳು..ಅವುಗಳನ್ನ ಹೊರನೂಕುವ ಆತನ ದಾರಿಗಳು ನೂರು.. ಅನಾಸಿನ್ ಮಾತ್ರೆಯಿಂದ, ಫ್ಯಾನಿಗೆ ನೇತು ಬೀಳುವ ಗತಿಯ ತನಕ. ಈ 'ಆತ'ನಲ್ಲಿ ನಾನೂ ಒಬ್ಬನಾಗಲೇಬೇಕಾಗಿರೋದ್ರಿಂದ ನನ್ನ ಚಡಪಡಿಕೆಗಳ ಮೂಲದ ಕುತ್ತಿಗೆ ಹಿಚುಕುವಲ್ಲಿ ನಂಗೋಸ್ಕರ ನಾನು ಮಾಡಿಕೊಂಡಿರೋ ಒಂದು ಸಫಲ ಪ್ರಯತ್ನ ಈ 'ಬರವಣಿಗೆ' : ಬಹುಷಃ ಹಲವರಂತೆ. ಈ ಪ್ರಯತ್ನಕ್ಕೆ ಬೇರೆ ಬೇರೆ ಹೆಸರೂ ಕೊಡಬಹುದು. "ನಂದೇ ಆದೊಂದು ಐಡೆಂಟಿಟಿ ಬೇಕು" ಅನ್ನೋ ಹುಚ್ಚು ಇರಬಹುದು, ಸ್ನೇಹಿತರ ಸರ್ಕಲ್ಲಿನಲ್ಲಿ "ಭಾವುಕ" ಅನ್ನೋ ಹಣೆ ಪಟ್ಟಿಯಿಂದ ಭಿನ್ನವಾಗಿ ಬೆಳೆಯಬಹುದು ಅನ್ನೋ ವಿಲಕ್ಷಣ ಮನೋಭಾವವಿರಬಹುದು, ಹುಡುಗಿ ಕೈ ಕೊಟ್ಟಾಗ ಬ್ರಾಂದಿ ಬದಲು ಬರಹ ಮೇಲು ಅನ್ನೋ ಮುಂಜಾಗರೂಕತಾ ಖುಷಿ ಇರಬಹುದು..! ಗೊತ್ತಿಲ್ಲ.... ಯಾರೇ ಏನೇ ಹೇಳಿದರೂ ಸಧ್ಯಕ್ಕೆ ಒಂದು ಸುದೀರ್ಘ "About Me" ಬರೆದು ಮುಗಿಸಿದ ಮಜಾ ಇದೆ..!!

Tuesday, January 22, 2013

ಬಂದೇಬಿಟ್ಟಿದೆ ಆ ದಿನ..

ಸಾವಿರ ಅಳು ಕನವರಿಕೆಗಳ
ನಂತರದಲ್ಲೊಮ್ಮೆ
ಬಂದೇಬಿಟ್ಟಿದೆ ಆ ದಿನ..
ನಾ ಚಿತೆಯಾಗುವ ದಿನ..
ನೀ ಕೊಳ್ಳಿಯಾಗುವ ದಿನ..
ಪ್ರೀತಿಯೆಂಬ ಹೆಣ ಫಟಫಟನೆ
ಉರಿದುಹೋಗುವ ದಿನ..

ಕಣ್ಣೀರು ಸುರಿಸುವವರ್ಯಾರೇ ಹುಡುಗೀ..?
ನಮ್ಮಧ್ಯದ ಒಲವ ತಿಳಿದವರ್ಯಾರೂ ಇಲ್ಲ :
ಇಬ್ಬರ ಗೆಳೆಯರ ಬಳಗದಲ್ಲೂ..
ಕೊನೆಗೂ..
ಪ್ರೀತಿಗೆ ಅನಾಥ ಶವದ ಪಟ್ಟವೇ..

ಬೇರೆಯವನ ಬೆರಳಂಚಿನ
ಕರಿಮಣಿಗೆ ಕೊರಳೊಡ್ಡಲು
ಇನ್ನೂ ಸಮಯವಿದ್ದರೂ..
"ಓಡಿ ಬಾ" ಎನ್ನಲು
ನನ್ನ ಕೊರಳೊಪ್ಪದು ಪುಟ್ಟೀ..
ನಲ್ಲಿ ನೀರು ಕುಡಿಯುವವ ನಾನು.
ನಿನ್ನತಿಯಿಷ್ಟದ ನಿಂಬೆರಸಕ್ಕೆ ಬೇಕಾಗಿದೆ
ನಿಂದೇ ದುಡ್ಡು..!

ನಾ ಹೇಳುವುದೊಂದೇ..
ಇವತ್ತಿನ ಗೋಧೂಳಿಯಲ್ಲಿ ನಿನ್ನ ಲಗ್ನ..
ಹಸೆಮಣೆಯಲ್ಲಿ ಕುಸಿದು ಕೂರದಿರು..
ಹಾರ ಹಿಡಿದ ಕೈ ನಡುಗಿಸದಿರು..
ಬಿಗಿದ ಬಾಸಿಂಗಕ್ಕೂ ತಿಳಿಯದಿರಲಿ
ನನ್ನ ವಿರಹ..
ನನ್ನೊಡನೆ ಸರಿಸಿದ ಸಾವಿರ ಪದಿಗಳ ಮುಂದೆ
ಇನ್ನೊಬ್ಬನೊಡನೆ ಬರಿ ಏಳು ಪದಿ ದೊಡ್ಡದೇನೇ ನಿನಗೆ??

ನಾ ಕೇಳುವುದೊಂದೇ..
ನಿನ್ನೊಲವಿನ ಗಣಪನಲ್ಲಿ ಬೇಡಿಕೋ..
"ನನ್ನ ಮದುವೆಯಾದೊಂದು ವರ್ಷ
ಇವನಿಗಿರದಿರಲಿ ಕೈ ತುಂಬ ಕಾಸು.."
ಕಾರಣ..
ರಸ್ತೆಯಂಚಿನ ಬಾರು
ಇತ್ತೀಚೆಗ್ಯಾಕೋ ಕೈಬೀಸಿ ಕರೆಯುತ್ತಿದೆ..!

ಮತ್ತು..

ನಾ ಬೇಡುವುದೊಂದೇ..
ದಯವಿಟ್ಟು,ದಯಮಾಡಿ..
ನಾ ಮುತ್ತಿಟ್ಟ ಚೆಂದುಟಿಗಳಿಗೆ
ನಿನ್ನಾತ ಜಿಲೇಬಿಯಿಕ್ಕುವ ಚಿತ್ರವ
ಫೇಸ್ ಬುಕ್ಕಿನ ಗೋಡೆಗಂಟಿಸಬೇಡ.. :(
ಬಿಕ್ಕಿ ಸಾಯುವ ಸಾವು ನನ್ನದಾಗುತ್ತದೆ..
ಕೊನೆಯವರೆಗಿನ ಕೊರಗು ನಿನ್ನದಾಗುತ್ತದೆ..

ಇಷ್ಟು ತಿಳಿಸುವುದಿತ್ತು ನಿನಗೆ. ಇಷ್ಟೇ..

Tuesday, January 1, 2013

ಕೋತಿಯಂಥವಳು ನೀನು..

ಕೋತಿಯಂಥವಳು ನೀನು..
ಕೀಟಲೆಗಿನ್ನೊಂದು ನೇಮು..!
ಮಡಿಲಿಗೊರಗಿಸಿ,
ಕಡಲೆ ತಿನ್ನಿಸಿ,
ಕಿವಿಕಚ್ಚಿ ಕಂಬಿಕಿತ್ತೆ ಮೊನ್ನೆ..!

ನಾನೇನು ಕಡಿಮೆ ಕೂಸೇ..?!
ಸುಮ್ಮನೇ ಕುಂತೆ :
ಪಕ್ಕದ ಬೆಂಚಿನಲ್ಲಿ
ತುಟಿಯೊತ್ತಿದ ಜೋಡಿಯ ನೋಡುತ್ತಾ..!

ಕೈಯಲ್ಲಿ ಕಡಲೆಯುಳಿದಿತ್ತೋ,
ಕುಂತಿದ್ದು ಕಂಡು,ನೋಡಿದ್ದು ಕಂಡು
ಪಿತ್ಥ ಕೆರಳಿತ್ತೋ ಕಾಣೆ..
ಮತ್ತೆ ಬಂತಲ್ಲ ಹಟ್ಟಿಗೆ ಹಸು
ಕೋಣಕ್ಕೆ ಕಣ್ಣು ಪಟ್ಟಿ ಕಟ್ಟಲು..!

ನಮ್ಮನೆಯ ಹುಲ್ಲು ಮುಗಿದಿಲ್ಲ
ಪಕ್ಕದ ಕೊಟ್ಟಿಗೆ ಬೇಡವೆನ್ನುತ್ತಾ
ತುಟಿಗೊಂದಿಟ್ಟೆಯಲ್ಲ ಮುತ್ತು..!
ಆ ಕ್ಷಣ.. ಅದೇ ಕ್ಷಣ..
ಕಾಲ ನಿಂತ ನೀರಾದದ್ದು..
ತುಟಿಯಲ್ಲೊಂದು ಗೀರಾದದ್ದು..
ಪಕ್ಕದ ಜೋಡಿ ಎದ್ದು ಹೋಗಿದ್ದು..!

ನನ್ನಧರಗಳ ನನಗೊಪ್ಪಿಸಿದ ನಂತರ..
ವಸುಂಧರೆಯ ಸಪ್ತಾದ್ಭುತಗಳೆಲ್ಲವೂ
ಭ್ರಮಾಬೂದಿಯಲ್ಲಿ ಕರಗಿದಂತೆನಿಸಿ,
ಸ್ವಪ್ನದಲ್ಲುಲಿವ ಊರ್ವಶಿ ಶೋಡಷಿಯರೆಲ್ಲರ
ಘಮಗಳೂ ಕಮಟು ವಾಸನೆಯಂದೆನಿಸಿ,
ಹಸಿರು ತೊಟ್ಟಿಲಿನ ಹಕ್ಕಿಮರಿಗಳಿಗೆಲ್ಲ
ಒಮ್ಮಿಂದೊಮ್ಮೆಗೇ ಹೊಟ್ಟೆತುಂಬಿದಂತೆನಿಸಿ..
ಥೋ..
ಹಿಂಗೇ ಹೆಂಗೆಂಗೋ ಅನಿಸಿದ್ದು ನಿನ್ನಾಣೆಗು ನಿಜ.. :)

ಅಂತೂ
ಕೋತಿಯಾಗಿಸಿಬಿಟ್ಟೆ ನನ್ನನ್ನೂ..!
ನಾಳೆ ಸಿಕ್ಕಿದಾಗ
ಮಡಿಲು ನನ್ನದು.
ಒಂದೇ ಚೇಂಜು
ಕಡಲೆಯ ಬದಲು ಮುತ್ತುಗಳಿರುತ್ತವೆ ನನ್ನಲ್ಲಿ..!
ಹಾಗೆಯೇ
ಕರ್ಚೀಪಿಡುತ್ತೇನೆ ಪಕ್ಕದ ಬೆಂಚಿನಲ್ಲಿ..! :)