About Me

ಮನುಷ್ಯನಿಗೆ ಈ ಚಡಪಡಿಕೆಗಳು ಎಷ್ಟು ಹಳೆಯದೋ ಅಷ್ಟೇ ಹಳೆಯದಾಗಿದ್ದು ಅದರಿಂದ ಹೊರಬರುವ ಆತನ ಪ್ರಯತ್ನಗಳು. ಮುಗಿದದ್ದು ಮುಗಿದೇ ಹೋಯ್ತು ಎನ್ನುವಷ್ಟರಲ್ಲಿ ಮನೆ ಹೊಸ್ತಿಲಲ್ಲಿ ಕಾದು ಕೂತು ತಟ್ಟೆ ಬಡಿಯುವ ಭಿಕ್ಷುಕರ ಗುಂಪಿನಂತೆ ಮತ್ತೊಂದಷ್ಟು ಚಡಪಡಿಕೆಗಳು..ಅವುಗಳನ್ನ ಹೊರನೂಕುವ ಆತನ ದಾರಿಗಳು ನೂರು.. ಅನಾಸಿನ್ ಮಾತ್ರೆಯಿಂದ, ಫ್ಯಾನಿಗೆ ನೇತು ಬೀಳುವ ಗತಿಯ ತನಕ. ಈ 'ಆತ'ನಲ್ಲಿ ನಾನೂ ಒಬ್ಬನಾಗಲೇಬೇಕಾಗಿರೋದ್ರಿಂದ ನನ್ನ ಚಡಪಡಿಕೆಗಳ ಮೂಲದ ಕುತ್ತಿಗೆ ಹಿಚುಕುವಲ್ಲಿ ನಂಗೋಸ್ಕರ ನಾನು ಮಾಡಿಕೊಂಡಿರೋ ಒಂದು ಸಫಲ ಪ್ರಯತ್ನ ಈ 'ಬರವಣಿಗೆ' : ಬಹುಷಃ ಹಲವರಂತೆ. ಈ ಪ್ರಯತ್ನಕ್ಕೆ ಬೇರೆ ಬೇರೆ ಹೆಸರೂ ಕೊಡಬಹುದು. "ನಂದೇ ಆದೊಂದು ಐಡೆಂಟಿಟಿ ಬೇಕು" ಅನ್ನೋ ಹುಚ್ಚು ಇರಬಹುದು, ಸ್ನೇಹಿತರ ಸರ್ಕಲ್ಲಿನಲ್ಲಿ "ಭಾವುಕ" ಅನ್ನೋ ಹಣೆ ಪಟ್ಟಿಯಿಂದ ಭಿನ್ನವಾಗಿ ಬೆಳೆಯಬಹುದು ಅನ್ನೋ ವಿಲಕ್ಷಣ ಮನೋಭಾವವಿರಬಹುದು, ಹುಡುಗಿ ಕೈ ಕೊಟ್ಟಾಗ ಬ್ರಾಂದಿ ಬದಲು ಬರಹ ಮೇಲು ಅನ್ನೋ ಮುಂಜಾಗರೂಕತಾ ಖುಷಿ ಇರಬಹುದು..! ಗೊತ್ತಿಲ್ಲ.... ಯಾರೇ ಏನೇ ಹೇಳಿದರೂ ಸಧ್ಯಕ್ಕೆ ಒಂದು ಸುದೀರ್ಘ "About Me" ಬರೆದು ಮುಗಿಸಿದ ಮಜಾ ಇದೆ..!!

Monday, February 4, 2013

ಕತ್ತಲೆಗೊಂದು ಧಿಕ್ಕಾರದೊಂದಿಗೆ..


ಇರುಳಿನ ಬಿಗಿದಪ್ಪುಗೆಯಲ್ಲಿ
ಹರಿದ ರವಿಕೆಯೊಳಗಿಂದ
ಥಟ್ಟನೆ ಗೋಚರಿಸಿತವಳೆದೆ
ಮರಿನಾಯಿಯಕ್ಷಿಯೊಳಗೆ
ಪಕ್ಕದಲ್ಲಿದ್ದ ಹಸಿದ ಮರಿನಾಯಿಗೆ..

ತನ್ನಮ್ಮನ ಆರ್ಮೊಲೆತೊಟ್ಟುಗಳೂ
ಬರಿದಾಗಿ ಹಪ್ಪಳವಾಗಿವೆ..
ಕ್ಷೀರಸಾಗರ ಕಡೆವ ದೇವತೆಗಳೊಂದು
ಲೋಟವಾದರೂ ಅಮ್ಮನೆದೆಗಿಟ್ಟು
ತುಳುಕಿಸಲಾರರೇ??
ಎಂದತ್ತುಕೊಂಡು ಮರಿನಾಯಿಯ ಪಕ್ಕದಲ್ಲಿತ್ತು
ಆ ಹಸಿದ ಮರಿನಾಯಿ..

ತುಂಬಿದೆದೆ ಕಂಡೊಡನೆ
ಮುರಿದೊಂದು ಕಾಲನೆಳೆಯುತ್ತಾ ಓಡಿ
ಹರಿದ ರವಿಕೆಯ ಜಾಗಕ್ಕಗಲಿಸಿತು ಬಾಯಿ.
ಬಿಳಿಹಾಲ ಬದಲು
ಹನಿರಕ್ತವಂಟಿತದರ ತುಟಿಗೆ..
ಆರ್ಮೊಲೆತೊಟ್ಟುಗಳ ನಾಯಿಯ ಮರಿಗೇನು ತಿಳಿದೀತು
ಆರ್ಮಂದಿ ಕಾಮುಕರ ಅಟ್ಟಹಾಸ..??

ಹನ್ನೆರಡು ಹಸಿದ ಕಣ್ಣುಗಳಲ್ಲೂ
ಅವಳದೇ ಬಿಂಬಗಳು..
ಆದರೆ ದೇವರು ನಿರಾಕಾರ.
ಅವಳ ಗೋಳ ಕೇಳಲು
ಕಿವಿಯಿಲ್ಲ ಅವನಿಗೆ..
ಕೊನೆಗೆ..
ನಡುಮುರಿದ ಆ ಭಗ್ನಬಾಲಿಕೆಯನ್ನೊಂದು 
ತಿಪ್ಪೆಗೆಸೆದವು ವಾಂಛೆ ತೀರಿದ ಹಂದಿಗಳು..

ಹರಿದ ರವಿಕೆಯ ತುದಿ
ಗಾಳಿಗಲ್ಲಾಡಿತ್ತು..
ಮರಿನಾಯಿಯ ಪಕ್ಕ ಒರಗಿದ್ದ
ಮರಿನಾಯಿಗೆ ಹಸಿವು ಕಾಡಿತ್ತು..
ಓಡಿದ್ದ ಮರಿನಾಯಿಗೊಂದು ಕಾಲು ಕುಂಟು,
ಮಲಗಿದ್ದ ಆಕೆಗೆ ಮಾನ ಕುಂಟು.
ಹಸಿದು ಸಾಯುವ ಭಯ ಮರಿನಾಯಿಗಿತ್ತಾ??
ತಿಳಿದಿಲ್ಲ.
ಆದರೆ..
ಇರುಳು ತನ್ನಪುಗೆಯ ಸಡಿಲಿಸಿದ ಕೂಡಲೇ
ಕಂಡಿದ್ದು,ಕೇಳಿದ್ದು ಒಂದೇ ಶಬ್ಧ..
"ನಿರ್ಭಯಾ..".